დავუბრუნდეთ ბუნებრივ ღვინოს

წარმოიდგინეთ ღვინო, რომელიც დამზადებულია ისე, როგორც ჩვენი წინაპრები ამზადებდნენ საუკუნეების წინ - ქიმიის, მარკეტინგული ეშმაკობების და ტექნოლოგიური მანიპულაციების გარეშე. მხოლოდ ყურძენი, მიწა, ჰაერი, დრო და ის სიყვარული, რომელსაც მევენახე ვენახში ყოველდღიურად უნაწილებს ბუნებას. სწორედ ასეთია ბუნებრივი ღვინო - ღვინო, რომელიც არ მალავს თავის ნამდვილ სახეს.

ბუნებრივი ღვინო (natural wine) არ არის ახალი აღმოჩენა. პირიქით, ესაა ღვინის ყველაზე ძველი ფორმა, რომლის საფუძველი საქართველოში დაიდო შორეული წარსულიდან, თუმცა ბოლო ათწლეულში ის სრულიად ახალ შინაარსს იძენს - როგორც წინააღმდეგობა ხელოვნურად წარმოებული, ტექნოლოგიურად „დაბალანსებული“ ღვინოების მიმართ და როგორც ცხოვრებისეული არჩევანი მათთვის, ვინც ბუნებრივს აფასებს.

ბუნებრივი ღვინო არ არის მარკეტინგული ხრიკი, ის არ არის უბრალოდ მოდა. ეს არის მოძრაობა. არჩევანი იმ ადამიანებისთვის, ვისაც სჯერა, რომ სუფრის ღვინო ისეთი უნდა იყოს, როგორიც ბუნებამ და ადამიანმა ერთად შექმნეს - დაუმატებელი, დაუფარავი, დაუქვემდებარებელი ქიმიურ კორექციას.

ბუნებრივი ღვინო, მარტივად რომ ვთქვათ, არის ღვინო, რომელიც მზადდება მინიმალური ჩარევით როგორც ვენახში, ისე მარანში. ეს ნიშნავს:

- ვენახი არ იჟღინთება ქიმიური სასუქებით ან პესტიციდებით;

- ყურძენი იკრიფება ხელით, სრულ სიმწიფეში;

- დუღილი მიმდინარეობს კულტურული საფუარების გარეშე, მხოლოდ იმ მიკროფლორით, რაც ბუნებრივად არსებობს ყურძნის კანზე და გარემოში;

- ღვინოში არ ემატება არანაირი დანამატი - არ არსებობს „გემოს კორექტორები“, კონსერვანტები, ფერის გამაძლიერებლები;

- არ გამოიყენება მძიმე ფილტრაცია, პასტერიზაცია ან სხვა ინტენსიური ჩარევა.

ეს ყველაფერი ნიშნავს, რომ ბუნებრივ ღვინოში მხოლოდ ყურძენი და დუღილია, ხოლო დანარჩენი - შედეგია ვენახის თავისებურების, კლიმატის, ნიადაგის და მევენახის ხელწერის.

უკანასკნელი ათწლეულის განმავლობაში ბუნებრივი ღვინო მშვიდი, მაგრამ მტკიცე ტემპით იპყრობს ევროპისა და ამერიკის ბაზრებს. პარიზში, ბერლინში, კოპენჰაგენში, ლონდონში, ნიუ-იორკში ბუნებრივი ღვინის ბარები და მაღაზიები ერთგვარ სოციალურ სივრცეებად იქცა.

როგორც ზევით ვახსენეთ, საქართველო არა მხოლოდ ღვინის სამშობლოა, არამედ ბუნებრივი ღვინის იდეის ისტორიული აკვანი. ქვევრი, ცოცხალი ღვინო, გაუფილტრავი სტრუქტურა - ეს ყველაფერი ჩვენს კულტურულ მეხსიერებაშია.

დღეს საქართველოში ათობით ნატურალური მეღვინეა. ზოგიერთი მათგანი უკვე სახელგანთქმულია ევროპასა თუ ამერიკაში, ზოგი კი ახლახან იწყებს. მაგრამ ყველა მათგანი ქმნის ერთიან მოძრაობას - გავაცოცხლოთ ქვევრი, გავაცოცხლოთ სოფელი, გავაბუნებრივოთ ღვინო.

ბუნებრივ ღვინოს ყოველთვის არ აქვს ეტიკეტზე წარწერა „ბუნებრივი“. ხშირად არ არსებობს სერტიფიკატი, რადგან ეს მოძრაობა ნაწილობრივ ანარქიულია, თუმცა საქართველოში ბუნებრივი მეღვინეების დიდი ნაწილი “ბუნებრივი ღვინის ასოციაციის” წევრები არიან.

ბუნებრივი ღვინო არ ცდილობს ყველას მოაწონოს თავი. ის არ არის უნივერსალური, არც პროგნოზირებადია. მაგრამ თუ ერთხელ სწორ ბოთლს აღმოაჩენთ — ის შეგახსენებთ, როგორი შეიძლება იყოს ნამდვილი ღვინო.